Isa 50 | NdeIBE | STEP | Nanku okutshiwo nguJehova: “Singaphi isithupha sikanyoko sokuchitha umtshado engamxotsha ngaso na? Loba nguwuphi walabo engilezikwelede kubo engalithengisa kuye na? Lathengiswa ngenxa yezono zenu, lonyoko waliwa ngenxa yokona kwenu.

Isaiah 50

Isono sika-Israyeli Lokulalela Kwenceku

1 Nanku okutshiwo nguJehova: “Singaphi isithupha sikanyoko sokuchitha umtshado engamxotsha ngaso na? Loba nguwuphi walabo engilezikwelede kubo engalithengisa kuye na? Lathengiswa ngenxa yezono zenu, lonyoko waliwa ngenxa yokona kwenu.

2 Ekufikeni kwami, kungani kwakungelamuntu na? Ekubizeni kwami, kungani kungekho muntu owasabelayo na? Ingalo yami yayimfitshane kakhulu ukuba ilihlenge na? Angilamandla okulikhulula na? Ngokukhuza nje kuphela, ngiyalomisa ulwandle, ngiphendule imifula ibe yinkangala; izinhlanzi zayo zibole ngenxa yokuswela amanzi, zife ngenxa yokoma.

3 Ngembathisa umkhathi ngomnyama. Ngenze amasaka abe yisembeso sawo.”

4 UJehova wobukhosi unginike ulimi olufundisiweyo ukuba ngazi ilizwi lokuqinisa abadiniweyo. Uyangivusa ekuseni kwansuku zonke, avuse indlebe yami ukuba ilalele njengofundiswayo.

5 UJehova Wobukhosi uvule izindlebe zami, njalo angizange ngibe ngohlamukayo; angibuyelanga emuva.

6 Nganikela umhlana wami kulabo ababengitshaya, lezihlathi zami kulabo abacutha izindevu zami; ubuso bami angibufihlanga ekugconweni lekukhafulelweni.

7 Ngenxa yokuthi uJehova Wobukhosi uyangisiza angiyikuyangeka. Ngakho-ke sengiqinise ubuso bami babanjengelitshe lomlilo; njalo ngiyazi ukuthi angiyikuyangeka.

8 Lowo ongimelayo useduzane. Ngubani-ke ongangethesa amacala? Kasiqondane. Ngubani ongimangalelayo na? Kangiqonde!

9 NguJehova Wobukhosi ongisizayo. Ngubani lowo ongathi ngilecala na? Bonke bazaguga njengesigqoko, inondo izabadla.

10 Ngubani phakathi kwenu omesabayo uJehova elalela ilizwi lenceku yakhe na? Lowo ohamba emnyameni, ongelakho ukukhanya, kathembe ebizweni likaJehova abambelele kuJehova wakhe.

11 Kodwa khathesi, lonke lina eliphemba imililo lizenzele amalangabi okukhanyisa, sukani bo, hambani ekukhanyeni kwemililo yenu, lokwezibane elizikhanyisileyo. Elizakwamukela esandleni sami yilokhu: Lizalala phansi lisebuhlungwini.